Назaрбаев Зияткерлік мектебінің оқушылары Ален Акемей, Уалихан Әділханұлы және Жанерке Лесбек музейімізге арнайы келіп, бізге ерекше сый тарту етті — өте жақсы күйде сақталған винил күйтабақтарын табыстады.
Оқушылардың айтуынша, бұл күйтабақтарды мектепке жатақхана меңгерушісі Эльмира Жортарова тапсырған. Ал балалар олардың орны — грампластинкалар музейінде деп шешкен. Өз тарапымыздан біз балаларға күйтабақтардың тарихты дыбыс арқылы сақтайтын ерекше мұра екені туралы айтып бердік. Оқушылар өздері әкелген винил пластинкаларын, сондай-ақ музей қорындағы патефон пластинкаларын тыңдады.
Бүгінде винил дерлік шығарылмайды және біртіндеп сирек кездесетін дүниеге айналып келеді. Сондықтан мұндай табыстар ерекше құнды. Әр пластинка — бұл жай ғана музыка емес, тыңдауға болатын тірі тарих. Оның ішінде өз дәуірінің лебі, дыбыстың жылылығы және цифрлық форматпен толық жеткізу мүмкін емес ерекше көңіл күй сақталған.
Өткенге деген құрметі және музыкалық мұраны сақтауға қосқан үлестері үшін балаларға және оқушыларына қолдау көрсеткен ұстаздарына алғысымыз шексіз!